Тэлекамунікацыйны аператар і правайдар лічбавых паслуг МТС правёў дэманстрацыю магчымасцяў аўтаномнай 5G-сеткі SA. Дэманстрацыйную зону разгарнулі ў комплексе «Мінск-Арэна». Перадавая сетка пабудаваная на ўласнай інфраструктуры з выкарыстаннем абсталявання Huawei.
Тэхналогія 5G дазваляе дасягнуць гігабітных хуткасцяў бесправадной перадачы даных з мінімальнымі затрымкамі, высокай энергаэфектыўнасцю і магчымасцю падключэння мноства прылад адначасова. Гэта адкрывае новыя перспектывы для развіцця лічбавых сэрвісаў.
Сетка 5G дазваляе забяспечыць якасна новыя ўражанні карыстальнікаў падчас анлайн-прагляду 4K, а ў будучыні і 8К відэа. Дзякуючы высокім хуткасцям і нізкім затрымкам карыстальнік можа праглядаць і перамотваць відэакантэнт без неабходнасці чакання буферызацыі. Таксама 5G дазваляе камфортна прымаць «цяжкія» даныя і імгненна загружаць вялікія аб'ёмы інфармацыі на аддаленыя серверы - воблачныя сховішчы, YouTube і інш.
Бесперабойнае інтэрнэт-злучэнне ў сетцы 5G зробіць істотны штуршок у развіцці воблачнага геймінга: хуткасці новага пакалення скарачаюць час затрымкі і дапамагаюць атрымаць струменевае відэа ў выразным раздзяленні.
Тэхналогію таксама можна выкарыстоўваць для віртуальнай і дапоўненай рэальнасці (VR і AR). У перспектыве карыстальнікі VR-прылад змогуць глядзець анлайн-трансляцыі спартыўных мерапрыемстваў і канцэртаў з эфектам прысутнасці на трыбунах. Высокія хуткасці 5G будуць незаменныя для галаграфічных выклікаў і канферэнцый.
Акрамя таго, МТС прадэманстраваў рашэнне інтэрнэту для дому. Дзякуючы роўтару з падтрымкай 5G, у які ўстанаўліваецца SIM ад МТС, можна разганяць хатнія хуткасці і перадаваць/прымаць вялікія аб'ёмы даных на розныя прылады. Гэта рашэнне таксама можа выкарыстоўвацца ў прыладах «разумнага» дому і далейшага ўкаранення інтэрнэту рэчаў.
Запуск 5G паскорыць лічбавізацыю розных галін, масавае выкарыстанне IoT-прылад у галіне энергетыкі, тэлемедыцыны, прамысловасці і ЖКГ. Акрамя таго, тэхналогія спросціць кіраванне робатызаванымі прыладамі і беспілотным транспартам.
Аўтаномная 5G-сетка не залежыць ад іншых тэхналогій - 3G/4G. Гэта ў корані адрознівае яе ад папярэдніх тэставых запускаў у рэжыме 5G NSA (Non-standalone), які прывязаны да LTE-сеткі. Сетка 5G SA МТС працуе ў двух дыяпазонах - 1800 Мгц і 3500 Мгц. Гэта азначае, што ў выпадку камерцыйнага запуску сувязі пятага пакалення можна будзе задзейнічаць існуючыя радыёчастоты.