Рэгістрацыя на Сямейны забег адкрытая! Юныя атлеты прабягуць па «дарослай» трасе Мінскага паўмарафону

МТС, Белаграпрамбанк, Дзіцячы фонд ААН (ЮНІСЕФ) у Беларусі і Беларуская федэрацыя лёгкай атлетыкі запрашаюць узяць удзел у Сямейным забегу, які пройдзе 10 верасня 2023 года ў рамках Мінскага паўмарафону. Пераадолець дыстанцыю ў 1,4 кіламетра па «дарослай» трасе могуць юныя атлеты ад 0 да 12 гадоў. Удзел у спартыўным мерапрыемстве бясплатны!

Каб выйсці на трасу Сямейнага забегу неабходна зарэгістравацца на сайце Мінскага паўмарафону. На дыстанцыю 1,4 км запрашаюцца дзеці ад 0 да 12 годоў. Пры гэтым дзеці да 6 гадоў могуць бегчы толькі з бацькамі. На фінішы кожнае дзіця атрымае медаль чэмпіёна.

Сямейны забег стане часткай дабрачыннай ініцыятывы. У час рэгістрацыі бацькі юных атлетаў змогуць зрабіць ахвяраванне ў падтрымку дзяцей з інваліднасцю. Пры суме ўзносу 35 рублёў і вышэй удзельнікі атрымаюць футболку з сімволікай забегу. Забраць яе можна будзе ў месцы выдачы рэгістрацыйных нумароў з 7 верасня на стойцы ЮНІСЭФ. Усе сабраныя сродкі будуць накіраваныя на закупку дапаможнага абсталявання, каб дзеці з інваліднасцю маглі вучыцца разам з равеснікамі. Бо камусьці патрэбны спецыяльныя парта і крэсла, а камусьці камунікатар, каб арганізаваць працэс навучання.

Таксама падчас правядзення Сямейнага забегу для дзяцей будзе працаваць інтэрактыўна-забаўляльная пляцоўка на запасным полі стадыёна «Дынама». Там можна будзе зрабіць яркія фатаграфіі, паўдзельнічаць у конкурсах, даведацца больш пра праграмы ЮНІСЕФ і развіццё інклюзіўнай адукацыі, а таксама наведаць пляцоўку дзіцячай лёгкай атлетыкі, абсталяваную спецыяльным інвентаром, каб юныя спартсмены змаглі пазнаёміцца з гэтым відам спорту.

«Мінскі паўмарафон - гэта знакавая падзея для сталіцы. І мы жадаем, каб дзеці маглі стаць часткай гэтага спартыўнага свята. Мы ведаем, як радуецца кожнае дзіця, якое пераадольвае дыстанцыю і пачувае сябе чэмпіёнам. Але галоўнае, дзякуючы такому маштабнаму мерапрыемству мы можам звярнуць увагу на пытанні дзяцей з інваліднасцю і разам з нацыянальнымі партнёрамі і ў далейшым садзейнічаць развіццю інклюзіўнай адукацыі ў краіне. Вельмі важна, каб ні адно дзіця не было самотнае ў сваіх цяжкасцях, каб кожнае дзіця мела магчымасць вучыцца ў школе», — падкрэсліў Прадстаўнік ЮНІСЕФ у Беларусі Рустам Хайдараў.

«МТС традыцыйна падтрымлівае спартыўныя мерапрыемствы, накіраваныя на папулярызацыю здаровага і актыўнага ладу жыцця. Адным з такіх яскравых прыкладаў з'яўляецца штогадовы дабрачынны забег для дзяцей у рамках Мінскага паўмарафону. Гэта выдатная нагода сабрацца разам і дапамагчы тым, хто ў гэтым асабліва мае патрэбу. І мы чакаем, што ў гэтым годзе да маштабнага праекта далучыцца яшчэ больш юных удзельнікаў», — Уладзіслаў Андрэйчанка, Генеральны дырэктар кампаніі МТС

ЮНІСЕФ у Беларусі разам з партнёрамі традыцыйна прымае ўдзел у Мінскім паўмарафоне з дабрачыннай ініцыятывай у падтрымку дзяцей з інваліднасцю. Так, дзякуючы дабрачыннай ініцыятыве ў 2022 годзе дапамогу атрымалі дзеці з Кобрынскага ЦВКІРа.