МТС адкрыў у Мінску «Музей мабільнага тэлефона». У калекцыі прадстаўленыя 120 кнопкавых тэлефонаў, выпушчаных з 1995 па 2011 год. Экспазіцыю сабралі супрацоўнікі мабільнага аператара.
Стварэнне музея прымеркаванае да Дня мабільнага тэлефона - 3 красавіка. У гэты дзень 48 гадоў таму інжынер кампаніі Motorola здзейсніў першае тэлефанаванне з дапамогай сотавага тэлефона.
Выстаўка «Музей мабільнага тэлефона МТС» аформленая ў выглядзе карціннай экспазіцыі, а кожны тэлефон прадстаўлены як асобны экспанат.
Самы стары апарат у калекцыі - Nokia THF-7 - родам з 90-х. Таксама прадстаўлены культавы тэлефон Nokia 3310 і іміджавы форм-фактар Panasonic G70. Ёсць таксама камунікатар Blackberry і беларускі тэлефон Еўратэф Е1.
У музеі паказаная эвалюцыя SIM-картаў МТС: ад SIM-карты 2002 года да SIM-чыпа ў фармаце мікрасхемы для прылад перадачы даных, якія працуюць у складаных кліматычных і вытворчых умовах. Функцыянальна SIM-чыпы нічым не адрозніваюцца ад звычайных SIM-картаў, а тэхнічныя характарыстыкі значна пераўзыходзяць пластыкавыя аналагі.
Акрамя кнопкавых тэлефонаў у музеі можна ўбачыць карціны ў стылі SIM-арт. Так, «Дзяўчына з жамчужнай завушніцай» Яна Вермеера сабраная з 900 SIM-картаў, а на аднаўленне партрэта «Мэрылін Манро» Эндзі Уорхала спатрэбілася 1344 SIM-карты.
Музей інтэрактыўны: некаторыя тэлефоны можна ўзяць у рукі і нават пагуляць у класічную «змейку». Спецыяльна для экспазіцыі распрацаваны дыджэй-сэт, які спалучае 20 рынгтонаў і розныя музычныя кірункі: House, Lo-Fi, Lounge і Electronica.
«Музей мабільнага тэлефона МТС» будзе працаваць штодня з 2 па 16 красавіка. Уваход вольны. Адрас: г. Мінск, вуліца Кастрычніцкая, 19, прастора «Вершы». Час працы - з 12 да 23 гадзін.
